Пряко предаване на богослужението от катедрален храм „Успение Богородично“

 

Сряда на пета седмица на Великия пост. Мчци Хрисант и Дария. Мчца Илария (Весела)

1 април (19 март ст. ст.) - Полунощница и лития за упокой, Трети, Шести, Девети час, Изобразителни, Вечерня с 30 стихири на Господи возвах и Преждеосвещена св. Литургия; Молебен при повсеместно разпространение на смъртоносна зараза - 8:00 ч.

 

***

ВЪ СРЕДУ ВЕЧЕРА

На Го́споди воззва́хъ: стихи́ра самогла́сна, ю́же глаго́лемъ два́жды, гла́съ 8:

Начина́емъ же стихи́ отъ: Впаду́тъ во мре́жу свою́ [грѣ́шницы, еди́нъ е́смь а́зъ, до́ндеже прейду́].

Мои́ми помышле́ніи въ разбо́йники впа́дъ, плѣне́нъ бы́хъ, окая́нный, умо́мъ, и лю́тѣ уязви́хся, всю́ мою́ ду́шу ура́нихъ, и отню́дъ лежу́ на́гъ добродѣ́телей на жите́йстѣмъ пути́. Свяще́нникъ же ви́дѣвъ мя́, ра́нами боля́ща безысцѣ́льна, презрѣ́въ, не воззрѣ́ на мя́; леви́тянинъ же па́ки, не терпя́ душетлѣ́нныя болѣ́зни, и то́й, ви́дѣвъ мя́, ми́мо и́де. Ты́ же, благоволи́вый не отъ Самарíи, но отъ Марíи воплоти́тися, Христе́ Бо́же, человѣколю́біемъ Твои́мъ пода́ждь ми́ исцѣле́ніе, излива́я на мя́ вели́кую Твою́ ми́лость.

Сти́хъ: Гла́сомъ мои́мъ ко Го́споду воззва́хъ, гла́сомъ мои́мъ ко Го́споду помоли́хся.

Па́ки ту́южде.
Сти́хъ: Пролію́ предъ Ни́мъ моле́ніе мое́, печа́ль мою́ предъ Ни́мъ возвѣщу́.

Му́чениченъ: Аще ка́я добродѣ́тель и а́ще ка́я похвала́ подоба́етъ святы́мъ? Мече́мъ бо преклони́ша вы́и, Тебе́ ра́ди прекло́ншаго небеса́ и соше́дшаго, излія́ша кро́вь свою́ Тебе́ ра́ди, истощи́вшаго Себе́ и зра́къ ра́бій пріи́мша, смири́шася до сме́рти, нищету́ Твою́ подража́юще. Ихже моли́твами по мно́жеству щедро́тъ Твои́хъ, Бо́же поми́луй на́съ.

Сти́хъ: Внегда́ исчеза́ти отъ мене́ ду́ху моему́ и Ты́ позна́лъ еси́ стези́ моя́.

Ины стихи́ры господи́на Іо́сифа, гла́съ 8. Подо́бенъ: Го́споди, а́ще и на суди́щи.
Го́споди, Ты́ свяще́нныя ученики́ Твоя́, слове́сная небеса́ показа́лъ еси́. Си́хъ свяще́нными хода́тайствы земны́хъ мя́ зо́лъ изба́ви, воздержа́ніемъ вознося́ ра́зума всегда́, къ страсте́мъ помышле́ніе мое́, я́ко Ще́дръ и Человѣколю́бецъ.

Сти́хъ: На пути́ се́мъ, по нему́же хожда́хъ, скры́ша сѣ́ть мнѣ́.

Подо́бенъ: Иму́ще вси́ вре́мя поще́нія, я́ко содѣ́йственника Боже́ственнымъ дѣя́ніемъ, пла́чимъ отъ всего́ се́рдца и Спа́су возопіи́мъ: Твои́ми ученики́, Го́споди Многоми́лостиве, спаси́ любо́вію Тя́ пою́щія, я́ко Ще́дръ и Человѣколю́бецъ.

Ина стихи́ра, господи́на Ѳео́дора, гла́съ то́йже. Подо́бенъ: Сла́вную и пречи́стую.
Сти́хъ: Смотря́хъ одесну́ю и возгля́дахъ, и не бѣ́ зна́яй мене́.

Апо́столи прехва́льніи, мíра моли́твенницы, немощны́хъ вра́чеве, здра́вія храни́теліе, во обое́мъ на́съ соблюди́те, поще́нія вре́мя проходя́щія, во обои́хъ боже́ственно ми́рствующія, у́мъ несмуще́нъ страсте́й храня́ще, да пое́мъ вси́ пѣ́снь Христу́ воскре́сшему, я́ко Побѣди́телю.

Ины стихи́ры по алфави́ту, 24, Вели́каго кано́на. Творе́ніе господи́на Андре́я Кри́тскаго, гла́съ 4. Подо́бенъ: Хотѣ́хъ слеза́ми.
Сти́хъ: Поги́бе бѣ́гство отъ мене́ и нѣ́сть взыска́яй ду́шу мою́.

[Α] Все́ житіе́ мое́ со блудни́цами и мытаря́ми изжи́ся, у́бо возмогу́ ли поне́ въ ста́рости пока́ятися, о ни́хже согрѣши́хъ, Содѣ́телю всѣ́хъ и Врачу́ неду́гующихъ? Го́споди, пре́жде да́же до конца́ не поги́бну, спаси́ мя́.

И твори́мъ на кíйждо сти́хъ по 3 покло́ны.
Сти́хъ: Воззва́хъ къ Тебѣ́, Го́споди, рѣ́хъ: Ты́ еси́ упова́ніе мое́, ча́стъ моя́ еси́ на земли́ живы́хъ.

[Β] Тя́жестію небреже́нія содержи́мь е́смь, въ ти́нѣ валя́юся, стрѣло́ю устрѣле́нъ веліа́ра, и оскверня́ю мое́ е́же по о́бразу. Обрати́телю небрегу́щихъ и Изба́вителю прегрѣши́вшихъ, Го́споди, пре́жде да́же до конца́ не поги́бну, спаси́ мя́.

Сти́хъ: Вонми́ моле́нію моему́, я́ко смири́хся зѣло́.

[Γ] Бы́хъ преткнове́ніе человѣ́комъ, воздѣ́лавъ, я́ко земны́й земна́я, бра́ку сопряго́хся Твои́мъ повелѣ́ніемъ, и преступи́хъ, оскверни́въ ло́же мое́. Отъ земли́ Созда́вый, не пре́зри созда́нія Твоего́, Го́споди, пре́жде да́же до конца́ не поги́бну, спаси́ мя́.

Сти́хъ: Изба́ви мя́ отъ гоня́щихъ мя́, я́ко укрѣпи́шася па́че мене́.

[Δ] Ря́дникъ бы́хъ души́ мое́й, о пло́ти мое́й промышле́ніе творя́, де́моновъ поруга́ніе поста́вленъ бы́хъ, сласте́мъ рабо́тая и безмѣ́стіемъ. Благоутро́біемъ Твои́мъ пощади́, прогони́телю де́моновъ, Го́споди, пре́жде да́же до конца́ не поги́бну, спаси́ мя́.

Сти́хъ: Изведи́ изъ темни́цы ду́шу мою́, исповѣ́датися и́мени Твоему́.

[Ε] Во́лею согрѣши́хъ па́че всѣ́хъ, сего́ ра́ди оста́вленъ е́смь, и́мамъ проти́вника души́ мое́й, пло́ти мудрова́ніе, и помрача́етъ мя́. Просвѣще́ніе су́щихъ во тмѣ́, и наста́вниче заблужда́емыхъ, Го́споди, пре́жде да́же до конца́ не поги́бну, спаси́ мя́.

Сти́хъ: Мене́ жду́тъ пра́ведницы, до́ндеже возда́си мнѣ́.

[Ζ] Живе́тъ, глаго́ла проро́къ, душа́ моя́, Го́споди, и восхва́литъ Тя́. Взыщи́ овча́ заблу́ждшее мя́, и сопричти́ мя́ ста́ду Твоему́, да́ждь ми́ вре́мя покая́нія, да стеня́, вопію́ Ти́: Го́споди, пре́жде да́же до конца́ не поги́бну, спаси́ мя́.

Сти́хъ: Изъ глубины́ воззва́хъ къ Тебѣ́, Го́споди, Го́споди, услы́ши гла́съ мо́й.

[Η] Согрѣши́хъ, согрѣши́хъ, преступи́въ повелѣ́нія Твоя́, Христе́ Бо́же, ми́лостивъ бу́ди ми́, Благодѣ́телю, да прозрю́ вну́треннима очи́ма, и убѣ́гну тмы́ и со стра́хомъ возопію́: Го́споди, пре́жде да́же до конца́ не поги́бну, спаси́ мя́.

Сти́хъ: Да бу́дутъ у́ши Твои́ вне́млющѣ гла́су моле́нія моего́.

[Θ] Звѣ́ріе мя́ ди́віи обдержа́ша, но отъ ни́хъ мя́ исхити́, Влады́ко, хо́щеши бо е́же спасти́ся и въ позна́ніе и́стины пріити́ всѣ́мъ человѣ́комъ, я́ко Созда́тель, и со всѣ́ми и мене́ спаси́, Го́споди, пре́жде да́же до конца́ не поги́бну, спаси́ мя́.

Сти́хъ: Аще беззако́нія на́зриши, Го́споди, Го́споди, кто́ постои́тъ? Яко у Тебе́ очище́ніе е́сть.

[Ι] Цѣльба́ бу́ди ми́, Благодѣ́телю, Изба́вителю, Спа́се мо́й, и не отри́ни мене́, ви́ждь мя́, лежа́ща беззако́ньми, и возста́ви мя́, я́ко Всеси́льный, да и а́зъ возвѣщу́ дѣя́нія моя́ и вопію́ Ти́: Го́споди, пре́жде да́же до конца́ не поги́бну, спаси́ мя́.

Сти́хъ: Имене ра́ди Твоего́ потерпѣ́хъ Тя́, Го́споди, потерпѣ́ душа́ моя́ въ сло́во Твое́, упова́ душа́ моя́ на Го́спода.

[Κ] Сокры́въ тала́нтъ, да́нный ми́, я́ко несмы́сленный ра́бъ въ зе́млю закопа́хъ, и́бо я́коже непотре́бный осуди́хся и не дерза́ю про́чее проси́ти Тя́. Яко незло́бивый уще́дри мя́, да и а́зъ воззову́: Го́споди, пре́жде да́же до конца́ не поги́бну, спаси́ мя́.

Сти́хъ: Отъ стра́жи у́треннія до но́щи, отъ стра́жи у́треннія, да упова́етъ Изра́иль на Го́спода.

[Λ] Езеро изсуши́вый страсте́й, кровоточи́выя прикоснове́ніемъ оме́тъ Твои́хъ, да́ждь ми́ оставле́ніе согрѣше́ній, несумнѣ́нною вѣ́рою Тебѣ́ притека́ющему, и пріими́ мя́, я́коже о́ную, и исцѣли́ мою́ болѣ́знь, Го́споди, пре́жде да́же до конца́ не поги́бну, спаси́ мя́.

Сти́хъ: Яко у Го́спода ми́лость и мно́гое у Него́ избавле́ніе, и То́й изба́витъ Изра́иля отъ всѣ́хъ беззако́ній его́.

[Μ] Имаши сѣдѣ́ти на престо́лѣ, Сотвори́вый сло́вомъ не́бо и зе́млю; и́мамы вси́ предста́ти, повѣ́дающе Тебѣ́ грѣхи́ на́ша. Пре́жде дне́ о́наго въ покая́ніи мя́ пріими́, Го́споди, пре́жде да́же до конца́ не поги́бну, спаси́ мя́.

Сти́хъ: Хвали́те Го́спода вси́ язы́цы, похвали́те Его́ вси́ лю́діе.

[Ν] При́зри о́комъ благоутро́бнымъ и бу́ди мнѣ́ ми́лостивъ, еди́не Спа́се, то́ки да́руй исцѣле́ній бѣ́дной мое́й и окая́нной души́, измы́й отъ ка́ла дѣ́лъ мои́хъ, да воспою́: Го́споди, пре́жде да́же до конца́ не поги́бну, спаси́ мя́.

Сти́хъ: Яко утверди́ся ми́лость Его́ на на́съ и и́стина Госпо́дня пребыва́етъ во вѣ́къ.

[Ξ] Мечи́ угото́ва веліа́ръ, улови́ти потща́вся смире́нную мою́ ду́шу, стра́нна сотвори́ мя́, Ще́дре, просвѣще́нія, ра́зума лица́ Твоего́. Держа́вный въ крѣ́пости, сосу́довъ сего́ исхити́ мя́, Го́споди, пре́жде да́же до конца́ не поги́бну, спаси́ мя́.

Сти́хъ: Къ Тебѣ́ возведо́хъ о́чи мои́, Живу́щему на небеси́, се́ я́ко о́чи ра́бъ въ руку́ госпо́дій свои́хъ, я́ко о́чи рабы́ни въ руку́ госпожи́ своея́, та́ко о́чи на́ши ко Го́споду Бо́гу на́шему, до́ндеже уще́дритъ ны́.

[Ο] Всѣ́мъ страсте́мъ порабо́тихся, оста́вивъ Зако́нъ и Боже́ственная Писа́нія, всего́ мя́ исцѣли́, Благодѣ́телю, мене́ ра́ди по мнѣ́ бы́въ, Бла́же, обрати́ мя́, Ще́дрый, страсте́й потреби́телю, Го́споди, пре́жде да́же до конца́ не поги́бну, спаси́ мя́.

Сти́хъ: Поми́луй на́съ, Го́споди, поми́луй на́съ, я́ко по мно́гу испо́лнихомся уничиже́нія, наипа́че напо́лнися душа́ на́ша поноше́нія гобзу́ющихъ и уничиже́нія го́рдыхъ.

[Π] Блудни́ца слеза́ми омоча́етъ пречи́стѣи же и честнѣ́и но́зѣ Твои́, вся́ увѣщава́ющи е́же притека́ти и пріима́ти разрѣше́ніе согрѣше́ній свои́хъ. Тоя́ вѣ́ру пода́ждь и мнѣ́, Спа́се, е́же вопи́ти Ти́: Го́споди, пре́жде да́же до конца́ не поги́бну, спаси́ мя́.

Припѣва́емъ къ про́чимъ: Сла́ва Тебѣ́, Бо́же на́шъ, сла́ва Тебѣ́.

[Ρ] Скве́рну очи́сти души́ моея́, мене́ ра́ди обнища́вый и младе́нствовавый пло́тію, ка́плю ми́лости Твоея́ низпосла́въ, немощно́му и окая́нному, Христе́, омы́й отъ скве́рны, уврачу́й неду́гующа, Го́споди, пре́жде да́же до конца́ не поги́бну, спаси́ мя́.

Сти́хъ: Сла́ва Тебѣ́, Бо́же на́шъ, сла́ва Тебѣ́.

[Σ] Утверди́, Влады́ко, ду́шу мою́, къ Тебѣ́ притека́ти и Тебѣ́ рабо́тати при́сно: Покро́въ бо мо́й еси́, и Храни́тель, и Заступле́ніе, и По́мощь, сподо́би, Бо́жій Сло́ве, вопи́ти мнѣ́ въ дерзнове́ніи: Го́споди, пре́жде да́же до конца́ не поги́бну, спаси́ мя́.

Сти́хъ: Сла́ва Тебѣ́, Бо́же на́шъ, сла́ва Тебѣ́.

[Τ] Стѣна́ неруши́мая бу́ди на́мъ, Іису́се Спа́се и Ми́лостивый Бо́же, нра́вы бо и дѣ́лы прельще́ни спадо́хомъ, но возста́ви, я́ко Благодѣ́тель, созда́ніе и примири́ся, я́ко Ще́дръ, Го́споди, пре́жде да́же до конца́ не поги́бну, спаси́ мя́.

Сти́хъ: Сла́ва Тебѣ́, Бо́же на́шъ, сла́ва Тебѣ́.

[Υ] Сы́нъ блу́дный бы́хъ, расточи́вый бога́тство, гла́домъ ны́нѣ истаява́ю. Подъ кро́въ Тво́й прибѣга́ю, я́коже о́наго пріими́ мя́, Отче Благíй, и прича́стника трапе́зы сподо́би, е́же вопи́ти Тебѣ́: Го́споди, пре́жде да́же до конца́ не поги́бну, спаси́ мя́.

Сти́хъ: Сла́ва Тебѣ́, Бо́же на́шъ, сла́ва Тебѣ́.

[Φ] За́вистію низложи́ рая́ первозда́ннаго злонача́льникъ; рекíй, е́же — помяни́, — на дре́вѣ разбо́йникъ, прія́тъ ра́й. Азъ же вѣ́рою и стра́хомъ, е́же — помяни́ мя́, — вопію́ Ти́, — Го́споди, пре́жде да́же до конца́ не поги́бну, спаси́ мя́.

Сти́хъ: Сла́ва Тебѣ́, Бо́же на́шъ, сла́ва Тебѣ́.

[Χ] Ру́ку ми́ простри́, я́ко Петро́ви, и возведи́ изъ глубины́, Бо́же, благода́ть и ми́лость ми́ пода́ждь моли́твами Всенепоро́чныя Ма́тере, Тебе́ ро́ждшія безсѣ́менно, и святы́хъ Твои́хъ всѣ́хъ. Го́споди, пре́жде да́же до конца́ не поги́бну, спаси́ мя́.

Сти́хъ: Сла́ва Тебѣ́, Бо́же на́шъ, сла́ва Тебѣ́.

[Ψ] Пою́ща пріими́ мя́, на вся́къ де́нь, Агнче, взе́мляй грѣ́хъ мо́й, ду́шу и тѣ́ло всецѣ́льно въ ру́цѣ Твои́ предлага́ю, и въ нощи́ и во дни́ до́лжно вопію́ Ти́: Го́споди, пре́жде да́же до конца́ не поги́бну, спаси́ мя́.

Сла́ва Отцу́, и Сы́ну, и Свято́му Ду́ху.

[Ω] О, неизрече́ннаго Твоего́ благоутро́бія, Преблагíй, Незло́бивый Го́споди! О, Безгрѣ́шный и Ще́дрый! Не отри́ни мене́ отъ лица́ Твоего́, я́ко да и а́зъ благода́рственно, ра́дуяся и поя́, вопію́ Ти́: Го́споди, пре́жде да́же до конца́ не поги́бну, спаси́ мя́.

И ны́нѣ, богоро́диченъ:
О, неизрече́ннаго снисхожде́нія! О, стра́ннаго рождества́ пречу́днаго! О, ка́ко Дѣ́ва Младе́нца Тя́ но́ситъ во объя́тіихъ Свои́хъ, Творца́ и Бо́га! Изъ Нея́ воплоти́тися изво́ливый, Благодѣ́телю Го́споди, пре́жде да́же до конца́ не поги́бну, спаси́ мя́.

МОЛЕБЕН ПРИ ПОВСЕМЕСТНО РАЗПРОСТРАНЕНИЕ НА СМЪРТОНОСНА ЗАРАЗА

Скъпи в Господа отци, братя и сестри,

Съобщаваме, че с благословението на Негово Високопреосвещенство Триадицкия митрополит Фотий, Предстоятел на Българската Православна Старостилна Църква, духовенството при катедралния храм „Успение Богородично“ ще отслужва редовно Молебен при повсеместно разпространение на смъртоносна зараза, всеки ден след края на сутрешното богослужение.

По-долу прилагаме файл с молебена в PDF формат, както и файл с молитвата от молебена.

Молебен при повсеместно разпространение на смъртоносна зараза

Молитва из молебен при повсеместно разпространение на смъртоносна зараза